لبن البودرة!

كتبت هذه القصيدة العامية ليلة 2 مارس، ضد شفيق وحكومته.. وملحقتش أتهنى بيها لأنه أقيل اليوم التالي .. 

****

قلنا يا ناس تور..

قالوا احلبوه..

يمكن كمان شهرين

تطلعلو حلمة..

والقشية تبقى معدن

ولبن البودرة يختفي من السوق.

***
**

شفيق يا راجل!

***
**

قلنا ياناس تور..

قالوا احلبوه..

ومرعي بتاع الكليمة

ماشي يدلل ع اللبن

حيعدل في القسمة

ويفرق ويوزع

من قبل ما الحلمة تطلع

بيوعدنا بأيس كريم ولا إيه..

يشوف الويل ما يدوب.

***
**

وقلنا يا ناس تور..

قالوا احلبوه

العم وجدي دا سكر

حيبعت شوية عسكر

زي البيبي روح أمه

اتقمص من الحلمة..

وأخد ع البزازة

وبعد ما الحلمة تطلع

حيسمع ويطيع

والصحة تبقى حديد

إكمن الرضاعة الطبيعية

حترجع من جديد

واللبن المغشوش  يختفي من السوق

***
**

وقلنا يا ناس تور..

قالوا احلبوه

فاتوا على صاحب الغيط

راجل خبرة ومجدع

حيدلل على اللبن في السوق

ومن قبل ما الحلمة تطلع

حيكون بايعه في بلاد برا..

ومثبت الناس والطوب

***

**

وقال إيه..

التور شاف سيده الجمل في السكة

ونده عليه تعالى علمني

يمكن الحلمة تطلع

لبن الجمال دا جَميل

ولو طلعلي حلمة

عمري ما حنسى الجِميل

ومحدش بقى عارفلك يا جمل

إن كنت صدقت ولا انضحك عليك

لِسّاتك عطشان ولا ارتويت..

ماهو سِلْوك انك تسوق الناس في الصحرا

وتلهمهم من صبرك صبر

والله صعبان عليا

كان إيه بس.. حدفك ع التيران..

وهَلمَّ جرا..

***
**

وقلنا يا ناس تور..

قالوا احلبوه!

طبْ شفيق ياراجل!